Corn Rigs Are Bonnie
R. Burns


It was upon a Lammas night
When corn rigs are bonnie,
Beneath the moon's unclouded light
I held awa to Annie:
The time flew by wi' tentless heed
Till 'tween the late and early,
Wi' sma' persuasion she agreed to
See me thro' the barley.

Corn rigs an' barley rigs
Corn rigs are bonnie,
I'll ne'er forget that happy night
Amang the rigs wi' Annie.

The sky was blue, the wind was still,
The moon was shining clearly:
I set her down wi' right good will
Amang the rigs o' barley,
I kent her heart was a' my ain
I loved her most sincerely;
I kiss'd her owre and owre again
Amang the rigs o' barley.

Corn rigs an' barley rigs
Corn rigs are bonnie,
I'll ne'er forget that happy night
Amang the rigs wi' Annie.

I lock'd in my fond embrace,
Her heart was beating rarely,
My blessings on that happy place
Amang the rigs o' barley!
But by the moon and stars so bright
That shone that hour so clearly,
She aye shall bless that happy night
Amang the rigs o' barley.

Corn rigs an' barley rigs
Corn rigs are bonnie,
I'll ne'er forget that happy night
Amang the rigs wi' Annie.

I hae been blythe wi' comrades dear
I hae been merry drinkin';
I hae been joyfu' gath'rin' gear
I hae been happy thinkin';
But a' the pleasures e'er I saw,
Tho' three times doubled fairly,
That happy night was worth them a'
Amang the rigs o' barley.

Corn rigs an' barley rigs
Corn rigs are bonnie,
I'll ne'er forget that happy night
Amang the rigs wi' Annie.

Midi sequenced by Barry Taylor

This is one of earliest works of Robert Burns, mentioned in "The Gentle Shepherd" as early as 1725, and is said to have been inspired by either Annie Ronald or Annie Blair. It is sometimes known as "The Rigs Of Barley". The original words were somwhat less genteel than those which Burns eventually produced. The melody is of English origion and was composed in 1680 to a song by D'Urfey beginning 'Sawney was tall and of noble race'. It was later used by Alan Ramsey in 1725 and by John Gay in 1729.

TOP OF PAGE

BACK

MAIN PAGE